طيور تغرّد

هو: كنا بنرسم نفسنا ونسيب الحياة تلوّن .. مسحنا حدود الرسمة وسبنا الألوان تسيح على بعض..

هي: كنا بنرسم نفسنا ونسيب الحياة تلوّن .. حدود الرسمة مسحناها وسبناها، و عبث الالوان إتكوّن

هو: نسيت كل اللي جواك وسِحت مع الألوان .. نسيت كل حاجة وأولهم إنك انسان..

هي: و لما آن الاوان و الرسمه بدأت تبان .. قلنا ياريت اللي جرى ماكان ... هاقول ايه،، ده طبع الانسان

هو: ويوم تقف وتبص جواك.. تبص للخراب اللي ملاك.. تفتكر اللي باعك ورماك.. وتكتشف إنه هو انت.. الروح اللي جواك.

هي: ترجع ترسم و تتفنن، تجيب القلم و الاوراق .. عندك امل ماتتجنن، عندك امل ما تتحيوّن، عندك امل .. متأخر فاق

هو: روحك تروح وتعود.. وأملك عمره ما بيموت .. لكن جواك شيء ناقص .. ممكن تسميه السكوت.. او الخوف من الموت.. أو روح اختفت وما بتعود. 

هي: كل ما تمسك طرف الخيط و تبدأ تشد فنفسك فوق، تاني يحوم الخوف حواليك يقطع نبض الخيط في ايديك و تاني تحاول، تلاقيك، مانتش عارف تفوق

هو: وبتتحرك وبتغني وبترقص وبتجري وتشكي وتروح وتضحك وترجع تبكي.. وحياتك مش منك ومشاكلك مش ملكك ولا قادر تحكي.

هي: الحكايه عصفور ذليل، مكسور جناحه بيرتعش فوق الغصون.. كان نفسه في بكره قوس قزح واخد حلاوه كل لون.. يملى غناه السكون.. في عز الليل

هو: يوم ما شوفته بيرتعش مسكتش وقولتله.. انت حر انت عصفور .. لا تحلق بجناح مكسور.. فليس هناك أجمل من حرية الطيور.

هي: طير في الصيف وفي الشتا.. ورا الشبابيك عيون،، تلملم ذكريات متشتته، تسرح تتوه ويا الفضا تلمح جناحك مفرود عالمدى.. تحسد جواك الجنون

هو: جنون لكنه مسجون .. يتحب لحظة ويكرهوه قرون .. مش فارق عنده غير السكون.. سكون نفسه سكون روحه سكون عقله المجنون،، ويبتسم لكن.. 

هي: ابتسامته بطعم الجرح، بطعم الملح.. صرخة أنِّته،، دموع وحدته، تبكيها الليالى والسنين، تلمس قلوب التعبانين، الشقيانين، الغرقانين..

هو: وكأن الليل حماه رفض يظهرُه.. وبالنهار خفاه ظل شجرة بتسحرُه.. والناس رايحة جاية وهو فـ عالم لوحده كل تفاصيلُه .. بتحييه وتقتلُه.

هي:عالم خيوطه بتتلون و تتشكل و بتحدد تفاصيله، تتلون بلون الليل لما الحزن بيجيله، و تتكون في شكل الخيل لما الفرح يناديله.. واهو طاير

هو: طاير بين أحلامه الصغيرة.. طاير على أمل واحد.. إنه يلاقي نهاية لآلامه الكتيرة.. أو إنه يقابلها .. يقابل الأميرة.

هي: أميرة الاحلام، حكايته قبل ماينام.. حكايه الشاطر العصفور، يلاقي الصبيه الحور، يطير في سماها الصافيه.. من غير غيوم 

هو: تحلق بقلبه عاليًا وتدور.. تضيع بين أحلامه وذكرياته لتجد الحاجز والآخر بينه وبينها. حواجز مزينة بالزهور. فهو طائر وهي أميرة الطيور

هي: لقاها احلى من اللي يتمناه.. اللمسه منها دفا و النظره من الاميره حياه.. كل اللي فات ملوش لزوم.. فهي الاميره و هو الشاطر العصفور

انتهت. 

تمت بمشاركة نهلة شرارة @NTheSpark على تويتر. 

:)