احنا فين؟
ناس كتير عايشة بتدور على حاجة
وناس سايبة الحياة تاخدها تلطش فيها حسب ظروفها
ناس شايفة انها زي ما تيجي تيجي
ناس حابة تخبط في كل موجة تقابلها وتصدها وتقولها لأ
ناس مؤمنة ان الموت معاده مكتوب ميعرفوش الخوف لأن الخوف مش هيحميهم من حاجة
ناس بتخاف عشان توصل لحاجة في حياتها على أمل ان ده يفيد غيرهم
ناس بتحب وبتدور على حب اللي حواليهم
ناس بتوهب حياتها لغيرها.. بيستمدوا الرغبة في الحياة من رسمهم لابتسامة على وش غيرهم
وناس بتدوس على قلبها وقلب غيرها وشايفين ان اللي هما شايفينه صح هيحصل غصب عن اي حد
وناس .. وناس .. وناس
انت مين في دول؟
هل وانت مكمل في حياتك وقفت للحظة وفكرت؟
فكرت ايه اللي وصلك هنا؟
ولا فكرت انت ماشي رايح لفين؟
هتعمل ايه عشان تتقدم خطوة كمان؟
فكرت انت ماشي لقدام ولا بترجع لـ ورا؟
للأسف في ناس مننا مبتقفش مع نفسها للحظة وتفكر ومكملين على طول وبيحللوا لنفسهم أي حاجة.. لو حصلهم موقف خبطهم في حيطة يقولوا قدرنا كده ولو وقعوا من حافة جبل يقولوا احنا طايرين.. ممكن يكونوا متفائلين لكن تفاؤلهم ممكن يوقعهم في مشاكل أكتر من مرة بدون ما يتعلموا..
ناس تانية بتفكر بواقعية وبيحبوا يدققوا في التفاصيل المهمة اللي ممكن محدش ياخد باله منها, بيهتموا بتحليل وفهم أي مشكلة يتعرضولها ويتنبؤوا بحدوثها تاني لو حصل نفس التفاصيل اللي سبقتها.. بيسموهم في مجتمعنا المتشائمين للأسف لكنهم مش مهتمين بالتسميات.. لأنهم واقعيين
ناس تالتة بتدور على الحزن والاكتئاب.. دايما شايفين الشيء الأسود في الخبر أو الحدث الفلاني.. والناس كلها فاكراهم منزعجين من اللي هما فيه, هما مستمتعين بلحظات الاكتئاب.. بتحسسهم بمعنى أي شيء يشوفوه.. هما شخصيتهم كده, مش من حق حد يحكم هما هيفشلوا في حياتهم ولا هينجحوا قبل ما ده يحصل..
ناس رابعة ودول اخر ناس متفرغة انها تتفرج عالتلات انواع اللي سبق ذكرهم وبيعلقوا ده بيعمل كده ليه وده معملش كده ليه وده كان المفروض يعمل ايه.. ماشيين في حياتهم العادية ك دراسة وعيلة وكده مبيعملوش اي حاجة مختلفة ومبيحسوش بنفسهم كل تركيزهم مع غيرهم, وبيعدي بيهم العمر وييجوا في وقت يقولوا ايه ده .. احنا كنا بنعمل ايه طول السنين اللي فاتت.. ميبقاش فاكر هو عمل ايه حتى السنة اللي فاتت لأن حياته مكانش فيها لحظات فارقة أو حاجات تستحق انه يفتكرها يعني..
طبعا اللي بيقرأ التدوينة دلوقتي هيقول ان الجملة الجاية هقول فيها مين احسن ناس في دول.. لا طبعا الفكرة دلوقتي انك تقدر تحاول تجمع الصفات الحلوة عند ده وعند ده وعند ده.. الحلوة دي مفيهاش قانون أو عُرف.. الصفات الحلوة في نظرك انت.. اللي انت مؤمن بيها وشايف ان انت مرتاح وانت كده.. حاجات مش عاجباك في نفسك وحاجات عاجباك في غيرك.. بدل ده ب ده وغير من نفسك مش عيب انك تتغير.. ممكن متتغيرش اوي زي مانت فاكر بس لو عملت حاجة ضميرك أنبك عليها.. محاولة التغيير نفسها هتخليك تفتكر ده بعدين.. وهتلاقي حاجة بتزن في ودانك ان الموضوع ده عاملك ازعاج.. لغاية ما تبتدي تتعود على ده وتتغير فعلا.. مش لازم بعد يوم او اتنين او اسبوع او اتنين ممكن بعد سنين تتغير.. أهم حاجة انك تكون بتقف للحظة مع نفسك وتفكر..
دور على نفسك
هتلاقيها في يوم من الايام
