غيـــــاب

أعتقد ان كل الناس دلوقتي شايفة اننا دخلنا نفق مظلم .. كله مش عارف دلوقتي ايه اللي مخبياه الفترة اللي جاية وكله متوقع حاجات كويسة وحاجات وحشة برضو .. محدش عارف البلد هتاخد اي اتجاه في الفترة القادمة .. و في مننا اللي محدد هدفه ومطالبه وفي اللي عاجبه الوضع الحالي ومش منزعج من حاجة اوي وفي اللي ماشي مع التيار الاقوى وفي اللي بيتفرج على كل دول وماشي جمب الحيط مش عايز يشارك ومكبر دماغه .. انا بكتب الموضوع ده عشان احاول على قد ما اقدر اعبر عن وجهة نظري ف كل اللي بيحصل.. 

المشكلة فين؟ .. والعيب ف مين؟؟ .. هو الحقيقة العيب مش ف حد معين بذاته .. العيب والمشكلة مش ف شخص ولا ف جهة سياسية ولا ف جماعة اسلامية ولا ف مجلس رئاسي ولا العيب ف الشعب نفسه .. سبب المشكلة متوزع على كل الناس .. وهوضح المشكلة فين بالتدريج كده عشان نوصل للأصل ف الاخر

مبدئيًا كده دلوقتي اي واحد يطلع يقول كلام جديد غير مألوف ينتقد حاجة معينة .. كله بيبتدي يدور ورا الشخص ده ويشوف عيوبه اللي ملهاش اي علاقة بالموضوع اللي هو اتكلم فيه.. ويقولولك انت بتتكلم ليه طب مانتا اصلا بتعمل كذا وكذا وكذا , و نشوف 100 سبب ننتقد الشخص ده وبعد كده نفكر -لو افتكرنا- ف الكلام اللي هو قاله .. يعني لو واحد قتل واحد بندور الاول على اللي اتقتل ده اصله وفصله ايه وعمل ايه وايه وايه ف حياته قبل ما نفكر نعاقب او -نعاتب- اللي قتله.. و طبعا لما ندور اكيد هنلاقي ولو ملقيناش هنخترع حاجة نقول عليها يستاهل.. ويا سلام بقى لو اهل اللي اتقتل ده اتنرفزوا او عملوا حاجة غلط بسبب انفعالهم وحزنهم على اللي اتقتل .. اكيد هنقول طب ده اسلوب محترم عشان نرجعلهم حق اللي ماتلهم؟ وهتسيب اللي قتلهم متحكمش على انه مجرد "قتلهم" 

ثانيًا .. الناس عندها هسهس ان الحياة يقف والروتين بتاع كل يوم يتقطع .. وف نفس الوقت بيلعنوا الروتين كل يوم اكتر من اليوم اللي قابله في وجود جملة يومية "البلد بقى حالها يزعل" وهما من البيت للشغل ومن الشغل للبيت .. يعني ايه ثورة تقوم وكله يبقى متأكد ان التعليم بايظ وأول  لما الدراسة تقرب نقعد نحاول نلم المشاكل بسرعة ونفض الاعتصامات ونقول بلاش مظاهرات عشان العملية التعليمية تشتغل عشان قال ايه "البلد حالها وقف" .. بتلحق ايه؟؟ انت تعليمك بايظ بتدخل جيل جديد ف منظومة التوهان التعليمية؟ والناس راجعة شغلها وكل حاجة راجعة لما كانت بس مجرد صورة اتشالت من فوق السبورة وفوق المكتب وكل حاجة ماشية زي ما هي.. 

ثالثا .. المصداقية .. مبقاش في حد يصدق حاجة الا الحاجة اللي على مزاجه .. يعني مثلا واحد معتمد عالتلفزيون والاعلام الفاسد ف اخباره ومؤيد لكل من يملك السلطة ف أول ما يسمع ان في تمويل من الخارج لحركة معينة مش بيحبها هيصدق وينشر الخبر كمان.. واول ما يسمع خبر يشككه ف الجهة اللي هو بيأيدها هيدور على 100 سبب يخلو الخبر غير منطقي وهيقعد يدور على صحة الخبر مليون مرة و حتى لو لقى الخبر صحيح هيقول انا اش عرفني انه صح؟ .. والكلام على الناحيتين ف في ناس برضو ضد اصحاب السلطة بيصدقوا اي اشاعة تطلع من الاشاعات اللي بتولعهم اكتر .. وينشروا كلام مش متأكدين منه لمجرد انه على مزاجهم.. ودي مشكلة كبيرة وهي قلة الوعي.. انك مش مقدر مدى خطورة الكلام اللي انت بتقوله .. وانك كل ما تنقل خبر كاذب كل ما بتزرع ف غيرك وبتزرع جوا نفسك انك متصدقش حد ومتثقش ف كلام حد مهما كان  صادق .. 

السبب ف كل ده ايه؟؟ 

لما تلاقي كل بني ادم دلوقتي عنده مبررات لأي حاجة غلط سواء ان كان هو اللي بيعملها او غيره , وتلاقي ان الصح مبقاش صح اوي وان الغلط ف بعض الاحيان بيبقى صح ان مكانش ف الاغلب.. لما تلاقي كل الناس بتبالغ جدا ف تقديرها لأي شخص او ف مهاجمة هذا الشخص ايا كان السبب .. لما تلاقي ان في ناس بتصلي بس بتشرب حشيش .. بيشربوا سجاير وفخورين عشان مبيشربوش حشيش .. ناس بتكذب وبتعمل حاجات غلط كل يوم وبدل ما يعاتبوا نفسهم بيتعودوا على الغلط .. ناس فاهمة الدين غلط وناس بتتكلم باسم الدين وناس بتتاجر بالدين وناس بتهاجم اي حد بيتكلم ف الدين .. 

تسأل ف اي حاجة مجموعة من الناس كل الناس هترد عليك وكله هيحاول يطلع ف الصورة .. 

هتيجي تاخد الحضور .. كله "افندم موجود" معادا واحد بس .. 

الضمير .. غيــــاب