بحبك يا بلدي.. بس ليه؟

اوقات كتير بنوصل لطرق مسدودة .. او في الواقع بيرسم لنا خيالنا انها مسدودة .. واوقات كتير بنرفض طرق معينة لأنها وعرة وفي طرق تانية قد تكون في مخيلتنا اسهل .. واوقات بيبقى قدامنا طريق يوصلنا للي عايزينه مع بعض التعب وطريق تاني اسهل شوية لكن مش بيوصلنا لجزء من اللي احنا عايزينه .. 

فقط في مصر بنفضل ندور عالحاجة الحلوة اللي تبشرنا حتى لو حاجة بعيدة كل البعد عن المنطق.. ودايما بنشوف الشخص الواقعي شخص كئيب ومتشائم وفقري وبيمثل على نفسه واوهام كتير كده ..

فقط في مصر بننبهر بالشخص اللي بيعمل الحاجة لمجرد انه هو مقتنع بيها كده وبنقول فيه شعر, وبرضو بنسقف ونحيي الشخص اللي ماشي ورا اللي بيكسب على طول وماشي ورا اللي الكل متفق عليه وبنقوله ايوة كده شاطر زي ما قولنالك .. 

فقط في مصر اللي عايز يعمل حاجة جديدة وينجح فيها بيتخيل اول حاجة التريقة اللي هياخدها هيبقى شكلها عامل ازاي .. ومتستغربش كمان لو قلتلك انه بيجهزلها ردود .. ماهو اتعدى منهم وابتدى يهتم لحاجات تافهة اللي هي الاشخاص دول اصلا.. 

فقط في مصر اللي عايز يغير حاجة غلط ومسيطرة وواخدة وضعها .. بيبتدي اول حاجة يلم ناس حواليه عشان عارف ان المجتمع وسخ ومش هينصفه لو هو لوحده .. تاني حاجة بعد ما يلم الناس يحاول يغير ف الحاجة دي ف يتفاصل يتفاصل ف الحاجة لغاية ما ياخد تلتها او ربعها او تمنها او يشم بس ريحتها كده .. ولو دكر بقى ورجولته نقحت عليه وطالب بيها ومعجبهوش طبعا مش صاحب الحاجة اللي هيرد عليه لأ ده الناس اللي ملمومين حواليه هيقولوله دانتا طماع بقى ماتحمد ربنا انت كنت فين وبقيت فين يا اخي ! .. 

فقط في مصر الشعب اتحرك وعمل ثورة عشان يغير اسلوب الحياة بشكل كامل .. بس لما الدراسة قربت قعد يقول كفاية مظاهرات وكفاية اعتصامات عايزين الدراسة تبتدي .. وكتب السنة اللي فاتت اللي مكتوب عليها حسني مبارك لسه متغيرتش مش المناهج بس اللي متغيرتش 

 فقط في مصر الشرطة تقتل 50 متظاهر ف كام يوم والشعب كله يلم تبرعات لعلاج المصابين ويتضامن مع التحرير بشكل كامل ومجرد  مالضرب توقف انضم للشرطة وابتدى يتهم المتظاهرين بالتآمر ضد البلد ومفكرش لحظة ف التحقيق مع الظباط او مع اللي قتلوا الناس.. 

فقط في مصر الطفل وهو صغير لو كان مسلم بيتقاله زميلك المسيحي ده كويس حبه هو زيه زيك  والمسيحيين دول ناس كويسين والعكس صحيح  .. طب ليه بتفرق من الاول ف مخ الواد طيب؟ 

فقط في مصر اي شخص ناجح بنحكم عليه بناءً على اي حاجة غير الحاجة اللي هو ناجح فيها عشان نطلع فيه العيوب كلها .. 

 فقط في مصر لو شفت بنت بتتعاكس ف الشارع قبل ما تهزق اللي عاكسها بتبص الاول هيا لابسة ايه .. 

فعلا ..صدق اللي قال: لا يصح الا الصحيح .. بس مش صحيح اوي يعني ..

فقط في مصر
--------------------------------------------------------------------------------------------
شكر خاص لمحمد بهيّ لانه هو صاحب اختيار العنوان