رحلة بين ألوان الحياة

مقال جديد واخير في هذه السلسلة وليس الاخير في المدونة ان شاء الله وهو مسمى جديد للحياة التي قد نعتبرها مجموعة من الالوان, وكل واحد فينا بيحب لون, بس مش لازم يكون بيكره لون, لأن كل لون بيمثل لكل واحد فينا حاجة معينة متعلقة باسلوب حياته او روتين معين في شغله او في دراسته او او ..


زي الاحمر بالنسبة لناس كتير ممكن يعبر عن الدم والقتل ويبقى لون مخيف بالنسبالهم, بالنسبة لناس تانية ممكن يعبر عن حماس , عن فريق بيشجعوه (مش عشان انا اهلاوي بس في فرق كتير فعلا بتلبس احمر) , يعبر عن الطاقة اللي طالعة من نار لونها احمر وبتديهم سخونية و حماس , اللون الاسود مثلا مثال اخر .. يعتبره البعض رمز للجدية والخصوصية والرزانة, والبعض الاخر بيعتبره رمز للتشاؤم والحزن , اللون الاصفر لون بالنسبالي رخم بصراحة وبيحسسني بالملل .. بس بيدي ناس كتير احساس بالاشراق والامل .. والنشاط ممكن .. 

في ألوان تانية بتبقى معنوية بتخيم على حياة ناس مننا : لون الحقد,, وهو لون ميتمثلش غير باللون الاسود, بيسيطر كتير على الناس اللي موراهاش غير التركيز مع غيرهم, وكل شغلهم وادائهم في مجالهم بيبقى مخصوص عشان يسبقوا اللي بينافسوه ده او بيحقدوا عليه.. لون الحب ,, وهو لون كل الناس شايفينوا جواهم, مع ان الواقع والظواهر بتقول انه بقى لون نادر في الوقت ده, لون فيه تسامح وتضحيات و رمزه ابتسامة جميلة بتظهر في وش صاحبه دايما.. لون الغضب,, وهو لون يميل دايما للأحمر, وفي معظم الاوقات بيكون لون رافض النقاش رافض اي رأي ومتشبث برأيه, غالبا بيندم صاحبه على نتايج اللون ده, لون الحزن.. لون بيخيم على اللي بيركزوا دايما في التفاصيل, دايما الناس بتهرب منه, واصدقاءه قليلين جدا, بتتعدد اسبابه, وسهل اوي انتشاره في المكان اللي صاحبه متواجد فيه.. لون الفرح,, لون كل الناس بتدور عليه, بيحتاج مجهود كبير اوي مصحوب بصبر, بنشوفه كتير لكن مؤخرا مبيظهرش بشكل كامل, مزيف ساعات, وساعات تانية مصطنع, والمعنى واحد.. 


الالوان عموما في شخصياتنا بتنتج عن صفات اكتسبناها من البيئة المحيطة اللي اتربينا فيها يعني اهلك , قرايبك , جيرانك, مدرستك اللي قضيت فيها اول كام سنة تعليم.. او قصص وقيم اتعلمناها من الناس اللي خبطنا فيهم في رحلة حياتنا بمواقفها الكتير, وكل يوم بنتعلم حاجة جديدة, وصفة جديدة, ونبص للي كان عندنا مش عاجبنا ونحاول نغيره.. مواقف بتعدي علينا وكل واحد بيفهمها بالطريقة اللي بتعجبه, او على قد مستوى تفكيره, ويعمل رد الفعل اللي بيرضيه, انا عايز حاجة غيري عايز حاجة تانية و الاتنين صح بالنسبة لكل واحد فينا, في النهاية كلنا متساويين والدنيا فانية, والحياة ببساطة رحلة طويلة مكونة من شوية محاولات بندور بيها على انسان كامل الصفات جوانا , وبنكمل فيه كل شوية بحاجة جديدة , زي لعبة البازل بالظبط, بس دايما في قطعة ناقصة, ودايما مبنلاقيش الانسان الكامل ده جوانا , عشان ببساطة .. الكمال لله وحده  بس المهم تكون حاولت وعملت اللي عليك واللي يرضي ضميرك, عشان لما عمرك يعدي الخمسين او الستين سنة, متحسش انك ضيعت عمرك عالفاضي. 


أحمد عبد الحافظ