بحر الحياة

حياتنا ببساطة عبارة عن مجموعة من الايام , ايام كتير .. منها الايام الحلوة اللي بنحب نفتكرها, و مبنبقاش عايزينها تعدي وبنبقى شايفين ان مش هييجي زيها تاني .. بس بييجي ,, ومنها ايام حزينة , بنبقى حاسين انها مش هتعدي وبنتخيلها اسوأ نهاية وانو مفيش اسوأ من كده ممكن يحصل, بس بتعدي .. وبنقول الحمد لله انها عدت .. 

ممكن لو فكرنا فيها بلغة تانية .. نقول انها امواج , منها الموجة الكبيرة .. اللي بتعدي علينا كلنا مع بعض في يوم واحد, منها اللي كلنا منقدرش نعارضها , زي موجة حزن في وفاة شخص , ومنها الموجة اللي بتتعارض وهتكلم عن ده قدام , و منها الموجة الصغيرة اللي في مننا اللي بيحس بيها و في اللي مبياخدش باله , الاختلاف مش في الموجة قد ما هو فينا احنا, في مننا اللي بيمشي مع الموجة , وفي اللي بييقف مكانه مستمتع بالموجة بس بيتفرج عليها بس رايح جاي معاها لا بيأثر ولا بيتأثر زي ما راح زي ما رجع, وفي اللي بيرفض الموجة ويكمل في طريقه عكسها وميتأثرش بيها عشان هي ضد رغباته ومش موافقها.

الموجة دي ممكن تكون علاقة بين اب و ابنه قد تكون موجة حنان او موجة عتاب, ودي موجة صغيرة خاصة بشخصين بس, ممكن تكون موجة أكبر شوية و قد تكون موجة فرحة زي ولادة طفل جديد في اسرة  مثلا ودي بتعم فرحة على كل العيلة, و ممكن تكون موجة حزن زي وفاة شخص تزعل عيلة كاملة .. و ممكن تكون الموجة كبيرة بس من نوع تاني .. وكلنا اتعرضناله و هو زي موجة التغيير (الثورة) في ناس كانوا هما اساس الموجة, وناس كانوا مسيطر عليهم مخاوف معينة, بس لما لقوا الموجة نجحت دخلوا مع الموجة, وفي ناس ركبوا الموجة و دي تختلف عن اللي قبلها , لأنهم مشاركوش ومدخلوش في الموجة هما ركبوها بكلامهم وشعاراتهم, بس هما مستعدين يبيعوها في ثانية في اي لحظة ضعف للموجة دي, وفي ناس رفضت الموجة وفضلت رافضة . 

بالنسبالي انا شخصيا , كل ده مش مهم, المهم فعلا انك تكون عارف انت اخترت موقفك من الموجة ده بقرارك انت, و تكون عارف هدفك من قرارك ده, و تكون محدد انت ناوي على ايه لما الموجة اللي بعدها تيجي, عشان متجيش تندم و لما يكون قرارك ده ب ايدك انت و تفكيرك انت , مش هتندم عليه, لأنه لو صح هتفخر بنفسك, و لو غلط هتتعلم منه و هتبقى عارف انك انت المسئول عنه مش هتعلق فشل القرار على حد غيرك. 

يتبع..