الحيـــاه لو لعبة

الاسبوع ده هنزل مجموعة مقالات ليست بالطويلة.. ولكنها كلها تدور في نفس الدائرة و تنتهي عند نفس النقطة .. 

وهي مجموعة محاولات لفك طلاسم الحياة .. في رأيي هي ليست طلاسم هي مجموعة من الافكار والتخيلات لهذه الحياة وقد يصعب التعبير عنها او تسميتها باسم معين .. 

هل الحياة مجموعة من الاصوات ؟ مجموعة من الالوان؟ الرحلات ؟ الخلافات؟ الاحلام؟ الرغبات؟ 

قد يعتبر بعضنا الحياة تحدٍ كبير .. و ياخد الموضوع بجد بس يصعبها على نفسه شوية و يدي الموضوع اكبر من حجمه .. نعم الجدية هي الافضل في كثير من الاحيان .. بس عشان تكمل لازم تفصل .. وممكن تعتبر ان الحياة لعبة .. عادي مش مشكلة لو بقت لعبة مانت ممكن تلعب بجد .. ولما بتيجي تلعب لعبة بتبقى مركز وواخدها تحدي برضو .. 

اللعبة دي مبنية على احلام كتير .. منها البسيط جدا ومنها المعقول وفي كمان المستحيل ! المهم ان الاحلام دي موجودة , ومؤمنين بيها, وبنحاول او بنتخيلها بتحصل لو مستحيلة. 

ممكن يكون الحلم بسيط لدرجة انه يكون بنت صغيرة بتلعب بطيارتها الورق على البحر وحلمها ان الطيارة تفضل فوق متنزلش, وان النهار يفضل مكمل ميخلصش , الحلمين اساسهم حاجتين اتنين .. او شعورين .. اول شعور هو الشعور بالمتعة و التاني هو الشعور بالالم او الحزن , كل احلامنا و اراداتنا بتطلع بناءً على الشعورين دول, يعني البنت دي كان عندها متعة وهي بتلعب ومش عايزة متعتها تتقطع ف بتحلم بان الطيارة تفضل فوق وده حلم بسيط جدا ممكن , اما الحلم المستحيل فهو ان النهار ميخلصش , كل ده مبني على الشعور بالمتعة اثناء اللعب .

اما الشعور بالحزن ف ممكن يولد حلم مستحيل زي ان شخص يتمنى عودة حد صديق عزيز عليه فقده, مش مشكلة انه حلم مستحيل,  المهم انه حلم و ميأسش , حلم زي ده هيخلي الشخص الحزين يخرج من حزنه عن طريق انه اول حد هيحاول يهون عليه الفراق و كتر الناس اللي حواليه هيخليه يدور جواهم على اللي فقده في صديقه , والبنت اللي حكيت عليها فوق لما تروح وتكون متضايقة هتلاقي كلمة من كل واحد يشوفها متضايقة و تجمع الكلمات دي و يدوها صبر يخليها تيجي تلعب تاني بكرة, الحياة مجرد لعبة و مينفعش تستسلم لازم تحاول وتحاول .. ومبحبش كلمة "مفيش حاجة تستاهل الزعل" لأ في حاجات فعلا تستاهل, بس زعلك ده لازم يعلمك ويأثر فيك تأثير ايجابي عشان بعد كده بتتعلم دروس من المواقف دي بتولد جواك قيم وحاجات اتعلمتها من كل شعور بالندم شعرت بيه, وكل شخص عزيز عليك فقدته , وكل حاجة كانت في ايدك و محستش بقيمتها الا لما راحت منك , كل ده هيعلم جواك, و في الاخر هتكون خرجت من اللعبة .. ممكن تكون خسرت كتير .. وممكن تكون كسبت كتير .. اهم حاجة انك حاولت ب أول حاجة : شرف , تاني حاجة : قناعة تامة ان دورك في اللعبة دي انت اللي لعبته بشخصيتك مش حد تاني لعبهولك , تالت حاجة : انك قبلت النتيجة , و رابع حاجة : تشوف الناس اللي لعبت معاهم حبوك ولا لأ و دي فعلا الحاجة اللي هتطلع بيها من اللعبة دي.

يتبع .. 

أحمد عبد الحافظ