شباب اونلاين

الحكم العشوائي والآراء اللا منطقية اللي بتطلع من غير تفكير ومن غير اي خلفية او انصاف على الناس عموما هم الحاجات اللي في عينة كبيرة من ال(شباب) عايشين عليها دلوقتي وده بيخليهم يفكروا بمنتهى السطحية ويتعاملوا مع حياتهم كأنها لعبة تافهة و نسيوا انها مفيهاش اوبشن ال(restart game) ,, 

"مالك يابني مكسوف ليه كده؟ .. هو انت يعني اللي هتغير العالم؟؟ .. متشرب يبني سجاير وللا خايف من امك؟ .. ماتسترجل يلا وتيجي معانا داحنا هنقضيها للصبح؟؟ .. تخسر صاحبك عشان بنت؟؟ .. مالك يابني بقالك فترة ملتزم انت بقيت اخوان؟؟ .. ايه يابني البنطلون ده مسمعتش عن البنطلون ال(slim) ؟؟ .. ايه يابني مش مصاحب ليه ؟؟ .." 

"ايه يا بنتي ماتصاحبيه عادي يعني هو احنا هنعيش الدنيا كام مرة وبعدين هو انتي بتعملي حاجة غلط؟؟ .. لعلمك اسمها ايه دي اتحجبت عشان بس شعرها وحش وشكلها احلى في الحجاب !! .. على فكرة هما بيحبوا بعض بس مقضينها استهبال و مش عايزين يتصاحبوا عشان كلام الناس!! .. بقولك ايه ادخلي على صورتي ومتعمليش لايك بس اديني كومنت يعليني كده !! بصي اسمها ايه دي عاملة نفسها شريفة قال يعني مش هتصاحب في يوم من الايام! "

 كل دي مصطلحات انتشرت اوي وفعلا الواحد يأسف انه يعيش في زمن ويكون في جيل كامل واجيال جاية وراه عايشة على الكلمات دي وماشاء الله بتضيفلها حاجات و تبدع وتخترع في الحاجات دي كمان .. 

شباب بقى كل اهتمامه يلحق يروح بالليل عشان يفتح الفيس بوك يشوف صورة صاحبه اللي قاله ماتنامش قبل ماتشوفها دي صورة فاجرة.. بنات ممكن يكون منهم اللي اهم حدث في يومها ان واحدة تعرفها اتحجبت وتعيش عالخبر ده اسبوع .. 

شباب وبنات منهم اللي فعلا ايجابي .. و ده بقوله عشان مبقاش ظلمت الجيل ده (اللي هو جيلي) .. لكن فعلا المشكلة الحقيقية اللي احنا مش مقدرين خطورتها .. ان الانسان الطبيعي بتاع زمان اللي هو مكنش متميز ساعتها في حاجة كان مجرد طبيعي .. لو موجود منه في جيلنا ده بيبقى مبهر ومش موجود منه كتير و ناس فعلا تديله احترامها .. و ناس كمان غيرهم يقولوله جملة نسيت اكتبها فوق "متقلع يابني طقم التمانينات ده احنا في 2011 " 

والاهالي عموما يحملوا جزء كبير من المسئولية في هذا الموضوع و لكنهم بيكتفوا بجملة "عيال مش متربية" كأن العيال دول هيربوا نفسهم بنفسهم .. 

هو ده الجيل اللي قدر انه يتفه كل حاجة .. و يحولها لحاجة عادية .. ببساطة عشان احنا في 2011 .. 

قدروا يفقدوا كل القيم والمبادئ و يمشوا بدماغهم اللي هما معتبرينها دماغ .. ببساطة عشان احنا في 2011 .. 

جيل جزء كبير منه بيتفاعل مع كل الاحداث اللي بتحصل في كل حاجة في بلده و في العالم .. بس مجرد تفاعل من خلال (status) كاتبه عالفيس بوك و كام واحد عامله لايك و كومنت .. ببساطة عشان احنا في 2011 .. 

لما البنت يبقى عندها 20 سنة و صاحبت حوالي 4 مرات او اكتر او حتى اقل و عادي وكمان المصيبة السودة ان الولاد متقبلين ده .. يبقى الجيل اللي هييجي من الجيل ده هيتربى على اي اساس؟؟ .. السؤال مش كده لا السؤال هيتربى اصلا وللا لا ؟؟ .. 

لما نجيب 100 واحد و نعد كام واحد منهم عارف قواعد لغته العربية و بيعرف يقرأ قرآن كويس .. وللا بلاش دول .. نعد كام واحد منهم بيقرأ كتب ومنلاقيش اكتر من 20 واحد ده لو ربنا كرمنا يعني .. يبقى الجيل ده ايه؟؟ 

جيل يمتلك ميزة قوية جدا ولكنها معدومة الفائدة و هي الجرأة .. ولكن الجرأة عندما تستخدم في حاجات زي دي تتحول لمسمى تاني هيضايق ناس كتير لما تسمعه و هو الوقاحة ! 

لما بنات يبقوا بيدردشوا مع بعض على ولد معين و واحدة فيهم تطلع تقول يا جماعة ده شخصيته حلوة جدا كفاية انه بيصلي!! .. يعني ما شاء الله اللي بيصلوا بقوا مبهرين دلوقتي .. 

بصراحة الجيل ده انا مستني منه كتير قدام .. يقدر يشتغل و يفيد ويطور قدام بس بشرط واحد .. ان يكون المنظومة في البلد عموما ماشية صح و هو هيعرف يمشي وراها .. انما لو مطلوب منه انه هو اللي يبتكر ويعمل حاجة جديدة مفيدة .. ف عينة و نسبة قليلة اوي منه هي اللي هتظهر في الوقت ده .. والباقي هيكون متفاعل .. ومتفاعل جدا .. ب 8 او 10 او 20 لايك!

أحمد عبد الحافظ