قاعدين بنلف و ندور حوالين نفسنا.. والحياة ماشية و مخنا هو اللي واقف مش عايز يمشي
اللي عايز يخلص من حد واللي عايز يقرب لحد واللي مش عايز غير حد واحد واللي عايز يكوش على كله بس مش مهم عنده مصلحة حد
مشكلتنا اننا بنفكر في قدام بطريقة غلط.. تاني حاجة بنفكر في نفسنا وبننسى غيرنا.. تالت حاجة بنزعل على اخطائنا اكتر ما بنتعلم منها ..
وممكن نتكلم على مصر ك افضل مثال لينا مع انه مثال في حاجات كتيرة محشورة معاه غير المشكلة بتاعت التفكير دي بس المهم ان هي الاساس ..
ببساطة المشكلة مشكلة تفكير, ناس كل احلامها انها تبني البلد وترجع الامن و خلاص وعايزة تخلص من الدوشة (اللي هما معتبرينها دوشة) ودول اغلبية الناس و ليهم اعذارهم وليهم عددهم المحترم الكبير جدا , ناس غاوية رغي عالفاضي و قاعدين عالقهوة بيسمعوا رأي اللي رايح عايز كذا واللي راجع عايز كذا ويسمعوا ده و يسمعوا ده و ملهمش رأي و بيروحوا يناموا, ناس متعذبة و تعتبر مش عايشة اصلا و مش فاهمين حاجة في اي حاجة و نفسهم حد يبصلهم لكن مفيش , و ناس غاوية تهاجم اي حد يطلع يقول حاجة الناس مش متعودة عليها,,, احنا عددنا كبير.. فصيلة مجتمعنا تحطنا في موقف انه سهل اوي يتلعب بمخنا خصوصا بعد الفساد اللي كان بيحصل زمان خلق جوانا قابلية لأننا يتضحك علينا او يوجهوا عقولنا لاتجاه معين (اكيد مش كلنا) .. والاسهل انه على اقل تقدير يتم تفرقتنا فكريا .. ان ده يقتنع برأي عكس رأيك اللي هو عكس رأي واحد غيرك و هكذا
و في ناس .. ناس عاديين .. زيي و زيك و معندهمش اي حاجة زيادة عن اي حد حواليهم .. بس عندهم حاجة ناقصة عند ناس كتير من المذكورين فوق .. و هو الرضا بالذل .. واحد يقول الحمد لله يا عم احمد ربنا دول لأ مبيقولوش كده احنا نحمد ربنا اه في الحلو والوحش بس منسكتش و منستسلمش و لما نعمل حاجة نعملها صح و نكملها صح .. ناس كان كل همها بكل بساطة .. ان الفرق بينهم و بين الاقل منهم ميبقاش موجود .. او عالاقل ميبقاش فرق كبير .. ناس اكبر احلامها عدالة .. اكبر حاجة تفرحهم تشوف واحد ضحكة طفل يتيم فقير وتشوف في عنيه الامل ببكرة ويشوفوا فيه انه يبقى عارف انه لو اتعلم و اشتغل هيلاقي اللي يقدره من غير وسايط .. ناس مايضايقهمش حاجة اكتر من حقيقة ان نص الشعب مغيب و مضلل عن طريق مربع اسود بيفضل اسود و بيسود كل العقول اسمه التليفزيون .. جهاز بيوجه ناس كتير اوي لاتجاه واحد .. منظومة متكاملة من كل شكل و لون .. تضليل عن طريق الكوميديا تلاقي .. تضليل عن طريق الحوار والخناقات تلاقي .. تضليل عن طريق القصص والمسلسلات تلاقي .. تضليل حتى عن طريق الاخبار اللي هي المفروض الحقيقة الواضحة مفيهاش آراء برضو هتلاقي !
جهاز مبيهتمش غير بالكلام الكبير.. الكلام المرسوم ال محدش يفهموا غير الناس اللي لسه متكلم عليهم دلوقتي .. بس لو فكرنا هي الناس دي بتطالب بالحاجات دي ليه؟؟ ايه مصلحتهم؟ هما يعني بيشتكوا من ايه؟ واحد زيي مثلا يمكن مفيش حاجة ضرتني شخصيا بذاتي و شخصي كده من النظام القديم .. اه كنت قرفان منه .. و قرفان من شكل مصر و نظامها و شوارعها و اسلوب ناسها .. بس مكانش عندي مشكلة عادي يعني زي ما كل الناس كانت عادي .. بس لما شفت ب عيني .. و فكرت شوية .. و رحت بخيالي لأني احط نفسي مكان واحد مش لاقي ربع جنيه ياكل .. اه هو خايب و مبيشتغلش و مبيجريش على اكل عيشه زي مالناس بتقول .. بس ده كله نتيجة ايه؟ .. نتيجة اننا بلد مفيهاش نظام اصلا .. لما في اليابان البلد هي اللي بتدور على الناس عشان تعلمهم مش هنا الناس هي اللي بتجري ورا التعليم و ورا الشغل و ورا لقمة العيش و مش لاحقين حاجة فيهم .. اه ذنبهم ماشي بس لما لقوا ان في اللي بيسرق و مبيتضربش على ايده بقى غني .. فكروا يبقوا زيو .. او عالاقل يرضوا بقليله و يسرقوا على قدهم يأكلوا نفسهم .. نظام عرف ازاي انه يزرع الفساد من تحت ويجني ثمارها من فوق .. دلوقتي احنا شلنا معظم الفروع بتاعت شجرة الفساد .. لكن الشجرة مازالت موجودة .. جذورها جوا كل واحد فينا .. والاعلام والتعليم الفاسد وكل من يشوه صورة اي حد مهما كان الحد ده مين بادعاءات كاذبة .. الثلاثة دول هم اللي موقفين الشجرة على رجليها ..
واحد يقولي يعني عاجبك السلفيين .. اقوله مالهم؟ انا لما اعرفهم ابقى احكم عليهم , ماشي لو مش عاجبينني ماروحش اشتمهم و ييجوا يردوا عليا و اقول اهو بيشتموني .. و على فكرة ! لو حد اتكلم على السلفيين حلو هيتهاجم .. و لو اتكلم على السلفيين وحش برضو هيتهاجم .. معنى كده ان العيب مش في اللي بيحاور العيب في الودان اللي بتسمع .. اللي اتعودت على اشكال معينة تسمعها و مش مستعدة تغيرها ..
التغيير يأتي من الداخل .. التفكير بوعي وواقعية .. يا اما نبقى فعلا مانستاهلش ديمقراطية بقى .. مش حالة جتلنا اتوحدنا فيها ايام الثورة وبعدين كل واحد رجع لنفسه و نسي الناس اللي فعلا عايزة البلد تمشي صح حتى لو هتتهد وتتبني من جديد بس تمشي صح .. لازم كلنا نفكر هو لو حسني مبارك و اعوانه مكانوش سرقوا البلد و لو كنا شغالين صح من 30 سنة كانت مصر هتبقى فين دلوقتي .. كنا هنبقى عايشين ازاي .. ؟؟؟
أحمد عبد الحافظ ..
No comments:
Post a Comment